嘉妮（嘉嘉）同林祖輝嘅愛情結晶品Kyra已經改咗中文名做「林煦錡」，嘉嘉同小小So講起做媽咪嘅心聲，就講到唔停得口，仲話依家出街出耐少少，已經要趕住返屋企。佢又話無時無刻都掛住個女，個女所有嘢佢都好關心，特別係所有「第一次」！好似Kyra第一篤屎、第一次打針，佢都非常緊張，仲記得打針嗰次，見到Kyra喊晒口咁，搞到佢勁心痛！
小小So：最期待佢咩第一次？
姚嘉妮：咩第一次都期待，但依家最想佢快啲第一次發燒！
小小So：咁得意？
姚嘉妮：因為BB唔舒服，會透過發燒表達出嚟，我一有事就會好緊張，所以依家已經猛同自己講唔好咁緊張，BB一定會發燒，係必經階段，希望真係發生時唔會太緊張。我請教過吳家樂，佢都話大女第一次發燒時，佢好緊張咁即刻同佢去醫院睇醫生，但輪到細仔發燒，就等到佢燒到反白眼先帶佢去醫院。