前晚任賢齊同黃長興為新戲《火龍》拍攝多場追逐戲，兩個人跑咗5、6次百米路程後，都忍唔住要抖大氣，小齊仲要搵櫈仔坐添！之後佢哋又拍攝另一場戲，講長興要被捲入車底重傷，佢化咗一個血淋淋嘅爛面妝，圍觀嘅觀眾見到佢呢個出位造型後，都不禁「嘩嘩聲」，而小齊就要捐入車底救佢！

小齊奮不顧身捐入車底救黃長興。	化了爛面妝的黃長興，成身血淋淋幾可亂真！	跑到腳仔軟的小齊，坐在櫈上休息。

爛面狂奔險撞人

問到街頭狂奔辛唔辛苦？長興話：「都辛苦！開頭以為盡力跑就得，但原來要就鏡頭，仲差啲撞到途人！」講起細佬黃長發同Karen分手一事被廣泛報道，長興明顯唔想多講，淨係話呢啲係細佬同Karen兩個人嘅事，自己怕講多錯多！而小齊就婉拒記者訪問，不過佢都好有禮貌咁同記者講句：「辛苦晒！」