現年38歲的洪欣，與比她年輕11歲的內地演員張丹峰今日拉埋天窗，昨日她在電話中暢談待嫁心情：「我既心情緊張又興奮，雖然蔡少芬、陳法蓉同蒙嘉慧班姊妹幫我準備好晒所有嘢，只係叫我好好放鬆心情，仲話出嫁當日要好好戰鬥，因為佢哋設計咗一大堆遊戲嚟為難新郎。（心痛？）我見班姊妹為咗我咁辛苦，都毫無怨言，好感動就真！」
心情極度複雜的洪欣表示，8歲兒子莫鎬濂將擔任花仔：「婚禮已經萬事俱備，但我始終有好多嘢心掛掛，我都有叫自己冷靜啲，但唔係話你想冷靜就可以冷靜。今晚會同班姊妹敍吓傾吓偈，但唔會見新郎，婚禮當日我會同新郎、伴郎、伴娘落樓畀傳媒影相，希望一切順利，所有賓客都開心。」
