趙碩之、戴夢夢同Melody尋日以動漫女神身份出席《香港動漫電玩節》記者會，而龔嘉欣、李婷同翁佳妮就以Cosplay「涼宮春日」Look亮相。雖然碩之冇玩Cosplay，不過都谷胸、露腿兼露Bra，吸引唔少攝影發燒友捧場！

龔嘉欣不屑與人鬥搶鏡，還表示平日甚少穿得如此性感。

Melody（左起）與夢夢吹水期間，碩之搭訕亦不忘烏身！

嫌棄扮Lolita

問到點解唔以Cosplay Look會友？夢夢搶住答：「係因為大會冇要求，如果有機會嘅，都好想Cosplay『北冥雪』！（點解唔扮愛美神？）我身材唔及碩之，佢先有飛彈！」碩之亦爽快答應：「好！等我嚟！」其實佢最想扮《戰神》嘅角色，仲踩Lolita太呆滯，比較鍾意活躍啲！

至於畀碩之搶晒鏡嘅龔嘉欣，強調尋日係幫電視台宣傳，唔係要鬥搶鏡：「其實我好保守，平時唔會着裙出街，做嘢就會變另一個人，今日條裙咁短，已經好性感！」佢話日前幫J2台拍咗一輯宣傳片，因為唔慣嗲聲嗲氣，搞到NG咗好多次！