人離鄉別井倍思親，所以喺異鄉見到同聲同氣嘅同胞特別傾得埋，小小So就最深明呢個道理。日前小小So原本去個模特兒選舉活動，諗住睇吓嚟緊有乜新模有潛質，但睇嚟睇去都係中國名模劉丹同戴小奕最省鏡，佢兩個雖然唔係成日喺香港，但見親都係孖住上，好似孖公仔，仲成日雞啄唔斷，唔知仲以為佢哋係同性戀者。
小小So新年前見到劉丹，仲記得佢話新年願望係識番個男朋友，小小So即時走去問佢搵到男朋友未？點知劉丹指住戴小奕話：「佢點都要黐住我。」戴小奕即時笑住話：「我好鍾意黐住你，點都要孖住我。」小小So見佢兩個你一言，我一語認真Friend到爆，就同劉丹講笑：「你咁樣點搵男朋友？」劉丹見搵男友依然未有進展，惟有搵戴小奕頂住檔：「我同佢一齊咪係佢男朋友，同佢一齊我就變咗同性戀者。」劉丹同戴小奕唔單止係香港同一間模特兒公司，一到國際時裝騷季節，就會齊齊到外國行騷，見得多變得好鬼Friend，佢哋雖然同行，但完全冇明爭暗鬥，認真難得！