本文重點
為宣傳新片《巨乳排球》，綾瀨遙日前喺東京接受本報記者訪問，被問到會唔會好似片中角色咁許下「咪咪約定」，遙妹就話絕對唔會，訪問過程盡顯可愛同率直嘅一面。
早喺電影《巨乳排球》計劃開拍時，擁有F Cup上圍嘅綾瀨遙已經係主角嘅不二之選，戲中遙妹為咗令一班「鹹濕仔」學生努力迎戰排球比賽，竟許下勝利就有「咪咪」睇嘅大膽承諾，但現實中嘅佢，就絕對唔會有咁嘅承諾。
其實一開鏡就要拍呢場「咪咪約定」嘅戲份，遙妹透露當時鬼咁尷尬，而飾演佢學生嘅幾位少男演員亦好緊張，好在佢哋都背熟對白，正式埋位都冇NG。《巨》片係由真人真事改編，遙妹單睇劇本已經畀啲勵志情節感動，原來佢一直擔心演出唔可以感動觀眾，所以好大壓力。性格神經質嘅佢，更加要靠食嘢嚟減壓，令佢體重暴增，但放假時就會節食減肥。
恨來港會影迷
至於喺九州取景期間，遙妹每日都喺酒店房做運動，又自己洗衫，將衣衫晾滿房間，佢話呢種感覺好舒服喎！不過講到煞科當日要同一班學生演員喊住道別，遙妹亦感動到眼濕濕。問到同班中學生相處有冇代溝？遙妹話：「我讀中學時連手機都冇，依家個個學生都有部iPod，覺得時代已經進化唔少。」對男士嚟講，《巨乳排球》嘅戲名確實非常吸引，不過遙妹就希望香港觀眾留意女主角率直同積極嘅一面，又話自己未去過香港，希望有機會來港一遊，同影迷見面。
採：西森路代東京直擊
攝：泉山美代子東京傳真