昨日林保怡偕蒙嘉慧（YoYo）及龔嘉欣等到小型賽車場，為無綫外購劇宣傳。他自言十年前曾玩過小型賽車，當時更發生意外而差點翻車：「當時唔知咁勁，意外後都嚇一嚇，好彩冇乜點傷。」保怡還踢爆YoYo在活動前曾要求他讓賽，並承諾會給予「着數」，故他笑指比賽時會識做為她護航。不過，YoYo得知保怡「踢爆」讓賽一事即抵死地說：「佢係咪怕自己會輸所以打定底！我冇打過畀佢！」提到男友鄭伊健的駕車技術時，她即讚技術比自己好：「佢可以甩到啲狗仔隊而我唔得，次次都畀佢哋跟到。我唔介意狗仔隊跟，但係唔好危險駕駛，好易有意外。」同場的龔嘉欣及李亞男齊齊表示已報名學車，但朋友聽罷均力勸放棄；而李蘢怡則自爆曾因超速及忘記入錶而被扣分。