剛由日本公幹返港的Angelababy，昨日與古巨基出席《361。和鞋互贈》活動，設計運動鞋巨型模型。Angelababy除了戴着和緋聞男友陳偉霆（William）代言的手錶外，相較到日本前，她的面容變得更靚更細緻，驟眼看來顴骨較高、鼻翼收細及下巴變得飽滿外，笑時只見酒凹而不見眼紋，面部皮膚顯得繃緊！

放大圖片	William與「翻版婷婷」Jeannie因拍MV傳緋聞，原來Angelababy已興師問罪！ 資料圖片

對於突然變靚，問到怕不怕被誤會整容？Angelababy說：「我紮高咗頭髮，以前『劉海』多，（額頭）又多粒粒！（日本有冇朋友教整容？）我冇整容！啲人成日拎我啲箍牙相比較，先有咁嘅感覺！（反對整容？）冇所謂，女仔始終貪靚，不過我唔會整囉！（打（Botox）針呢？）可能老咗有皺紋就會，依家唔使！（整容呢？）依家唔使，怕老咗有副作用，唔會用呢個方向改變自己個樣！」

查問William緋聞

另外，對於William亦被傳整容，她代為澄清：「我識佢嗰時已經係咁樣，5、6年前佢個鼻已經咁高！」至於有傳William與「翻版謝婷婷」撻着，她說：「我打畀佢問，佢話唔係！（咁忙仲有聯絡？）有咩新聞都會拎出嚟傾！（溝通吓感情？）係溝通，唔係感情！」她坦言若男友偷食，她會很傷心！昨日她身穿露臍裝，但與William的十字架紋身好像不翼而飛？她說：「仲喺度！雖然都係十字架，有啲唔同！（你又知？）我有留意報紙！」