擇偶 揀高妹靚仔
王祖藍自爆十年冇拍過拖，今次在電影《矮仔多情》中擔正做多情種子，周旋在Race、JJ、徐子珊及Angelababy等美女中，打正旗號追女仔，但他自言無福消受！
王祖藍：王 黃婉伶：R 賈曉晨：JJ
R ：新戲入面有咁多靚女，你最鍾意邊個？
王：我係醒目仔，梗係見到邊個就話鍾意邊個啦！
R ：唔得！我同JJ企喺你面前，你最少要二揀一。
王：唔……咁我揀熊黛林啦！佢咁高，正所謂最危險嘅地方就係最安全，最冇可能嘅就係最有可能！
JJ：個個男仔都係咁花心，我唔係拍過好多次拖，唔明點解連唔靚仔嘅都咁花心？將來一定要揀個靚仔同心地好嘅做男友。我識嘅男人圍埋一齊就係講女仔，依家諗通咗，我可以接受男友望其他女仔同思想上出軌，只要夠長情就得。
王：嘩！唔係嘛？其實唔係個個男人都咁花心，我返教會（基督教）識好多朋友都好專一同長情，當然男人圍埋一齊多數係講女仔，唔係講乜吖？但可以攞出嚟討論係一件好事，反而匿埋諗歪咗仲大罪，因為世界太多誘惑，所以我哋要互相鼓勵對方唔好行差踏錯。
Race唔介意倒貼
R ：我就覺得一啲啲啦！有啲男仔同佢拍拖時，未必見到佢真正性格，佢哋喺女朋友面前扮到好專一，其實本性好花弗，所以揀男友最好由朋友開始。而且我覺得男朋友唔一定要靚仔，有啲自以為好靚仔、好有才華，反而令人頂唔順！可能我份人唔係好計較金錢，有時同朋友出街都係由我同家姐畀錢，如果同男方係由朋友開始，我亦唔介意一人畀一次，咁會公平啲、健康啲，當然如果男友有錢就梗係由佢畀啦！
JJ：但我都係要揀靚仔，最鍾意古天樂呢類型，後生啲就係林峯，連Eason（陳奕迅）喺我眼中都好靚仔，仲有眼細細嘅周杰倫，同樣好有吸引力。
王：靚仔梗係着數啲，我唔單只心地好、個性活潑、又專一，揀女朋友要求仲好簡單，只要係基督徒同心地好就OK，只係你哋要求實在太高，JJ成日話要靚仔、Race又話要高過佢，我同佢差唔多高都冇用。
R ：因為我唔高嘛！都想下一代高大啲，所以咪要搵個高大型男朋友囉！
情史 宅男鬥惡女
分別來自濟南和新加坡的JJ和Race，雖然不是正宗「港女」，但亦帶有港女刁蠻特質，喜歡發小姐脾氣；而祖藍更自爆曾一度成為正宗「宅男」，終日躲在家中。
王：我都曾經做過宅男，嗰時鍾意咗一個女仔又唔敢追，搞到自我封閉邊度都唔敢去，成日匿埋喺屋企，又覺得自己係全世界最慘嗰個，諗番真係好戇居！依家人大咗識諗咗，我奉勸一班宅男一句，最重要係搵番自己嘅價值同吸引力，唔好自憐，你要身心健康先可以搵番一個健康嘅伴侶。
JJ：之前有雜誌屈我，話我唔鍾意港女，但我根本冇咁講過！佢哋列咗八十一個港女「特質」，但我覺得每個女仔都實有啲問題，我都有啦！冇理由話符合幾個Point就話係港女，咁樣講好唔公平。
R：啲男仔覺得女仔有問題，同樣女仔都會覺得男仔有問題啫！聽過一個朋友講，佢以前嘅女朋友係韓國人，平時好聽話，有次個男仔專登話要食個女仔最唔鍾意嘅泰國菜，個女仔都照應承，個男仔又嫌佢太冇主見，最後分手收場！其實呢啲冇話邊個啱或者唔啱，只係溝通問題啫！
JJ忍男友掌摑
JJ：我十幾歲嗰時有個韓國男友，佢間唔中會打我，兜巴摑落嚟，但當時我年紀細又任性，佢氹番我開心就算數，依家大咗當然唔會容忍啦！我承認以前比較任性，又鍾意鬧交，乜都可以嗌一餐，不過依家已經收斂咗好多！可惜依家好少出街，十足宅女咁識唔到靚仔！
R ：點得㗎？畀人打一定唔可以接受，推吓都唔得呀！如果對方事後解釋話唔小心都冇情講，呢啲冇得唔小心，一定要分手。
王：你哋係咪一直好多男仔追㗎？
R ：唔係！我以前好樣衰㗎！嚟香港之前從來未試過留長頭髮，因為爸爸鍾意整齊，頭髮唔可以長過膊，仲一定要One Length頭添！
JJ：我都係呀！細個好男仔頭，仲試過剪到得番一吋長，好肉酸！
拍戲 主角有壓力
祖藍在《矮仔多情》中首次獨擔大旗，而慣演驚慄片的Race則是首次演喜劇，難免感到壓力！
王：做男主角係第一次，個角色太過度身訂造，由頭到尾得我一個男主角，有少少壓力！
R：我喺戲入面飾演一個雙重性格嘅女仔，朝早跳芭蕾舞，夜晚跳艷舞，仲有啲精神分裂添！呢次係我第一次演喜劇，覺得自己唔係太有喜劇細胞，我冇當係喜劇咁演，演得好認真，喜劇部分要靠祖藍嘞！自己唱歌同拍戲都鍾意，似乎電影方面比較理想，今年仲可以提名金像獎「最佳女配角」，好開心！
王：有人問過我係咪想做星爺（周星馳）接班人？但其實真係未夠班，星爺實在太天才，佢喺電視台磨練咗好耐，有幾套成功嘅電視劇，而自己係半途出家，只係拍過一、兩部處境劇。我覺得Race有提名好叻女，自己就冇諗過可以被提名，尤其浮誇搞笑嘅演技好難攞到獎，加上呢部係搞笑奇情片，所以都係諗住帶啲歡樂畀大家啫！
後記：JJ懶理祖藍送秋波
「個性健康就吸引到人，我活潑又專一……」鬼馬的祖藍分享個人吸引之處時，不忘將視線投向在記者面前大嘆沒有理想對象的JJ，豈料正在對鏡補妝的JJ完全無視他所言，令祖藍哭笑不得！而Race笑言祖藍今次在戲中能享盡艷福，簡直是「天開眼」！在鏡頭前如是，想必祖藍在拍攝時肯定被一眾美女「為所欲為」吧！