澳洲樂隊Air Supply前晚於會展舉行《Never Ending Love巡迴演唱會》首站，二人除以情歌勁冧歌迷外，更走落台與攬Fans，亦有女Fans情不自禁上台與他們擁抱，場面熱鬧。身為忠實Fans的姚嘉妮，前晚與老公林祖輝睇騷，產後首次與老公二人世界的她笑言，感覺恍如當年拍拖一樣，但出街後卻相當掛念囡囡，更不時要拿出手機看囡囡照片，一解「相思」之苦，祖輝見狀亦不禁說：「佢掛到個女黐咗線！」嘉妮又表示上圍有輕微升Cup，但仍希望多減十磅：「暫時都未有纖體公司搵我，要呼籲吓！」

馬德鐘（左起）、佘詩曼及樂易玲結伴睇騷。	Air Supply大唱經典金曲，令歌迷聽出耳油。	自誇是好老公的魏駿傑，曾以AS名曲冧太太。

魏駿傑與舊愛冇聯絡

而魏駿傑前晚亦帶同來自重慶的年輕太太張利華睇騷，他更聲稱與舊愛滕麗名已沒有聯絡，並大讚阿滕與新歡郭政鴻相當合襯。此外，他又趁機在太太面前自誇是好老公，並透露曾以AS名曲《Here I am》冧太太。

至於佘詩曼、馬德鐘、李亞男、苟芸慧及陳百祥，亦陪同無綫高層樂易玲齊齊睇騷，阿佘說：「公司有六張飛，可能我假期唔使開工，有期！我有份睇都覺得好榮幸！」她又表示原本打算放假回夏威夷，但因豬流感（H1N1甲型流感）而擱置。