已經半年「零工作」嘅裕美，今次扭計唔成，惟有死死地氣向公司求和，不過未獲解凍！記者尋日打畀身在日本嘅裕美求證被雪傳聞，佢承認同公司有拗撬：「咁屋企人實有拗撬，不過未至於反枱嘅！我14歲加入呢間公司，今年已經21歲，不過佢哋仲叫我扮Cute，我只係想改變吓路線啫！最近有咁多17、18歲嘅新人加入，我都好擔心，希望有多啲變化！」

裕美曾與陳柏宇傳緋聞，帶起雙方人氣。 資料圖片

裕美（右起）曾與江若琳、鍾舒漫同獲新人獎，當時聲勢不錯。 資料圖片

提工作哦哦

問到係咪曾經提出解約？裕美即刻O晒嘴：「吓？冇傾過解約喎……」問到稍後有咩工作？裕美就哦哦咁話：「暑假好似有啲嘢做，但未落實囉！」

至於裕美所屬嘅Snazz行政總裁簡文迪，尋日承認裕美唔鍾意扮Cute同唱兒歌，仲好勞氣咁話：「每個藝人都有情緒問題，不過邊個藝人唔使捱先？佢簽得呢間公司，唔通我會害佢咩，咁對公司有咩好處？（係咪雪緊佢？）總之就畀佢思量吓啦！」

文：音樂組