一代奸人標誌「奸人堅」石堅前日下午病逝，不少圈中人均感惋惜，曾與堅叔合作電視劇《狂潮》、《親情》及電影《英雄本色III夕陽之歌》的周潤發，對堅叔離世大表傷感：「堅叔係好好先生，又好武功，係一位好好演員，佢嘅離世係電影界損失，不過，九十幾歲都係笑喪；堅叔係一位專業電影工作者，拍戲好刻苦耐勞，唔花弗、冇夜生活，係好踏實嘅藝人，對我有正面影響，修身、修心。」談及以往逸事，發哥說：「堅叔功夫好叻，但冇乜教我哋，因為合作嘅都係拍文戲多，加上大家都忙，所以冇表演吓佢嘅功夫。（同堅叔合作最難忘係咩？）最難忘佢嘅專業精神，佢拍戲會做足準備工夫，仲會帶咖啡去片場，收工拎住咖啡壺離開。」
嘟嘟：係香港Icon
曾於2003年代表香港電影金像獎頒獎禮送獎項到石堅府上的梁朝偉說：「細細個睇住堅叔嘅戲長大，佢係一位我好尊敬、欣賞嘅演員，佢嘅離開真係好可惜，希望佢嘅家人唔好咁傷心。」
至於早年與堅叔合作過不少劇集的鄭裕玲說：「堅叔係令人尊敬嘅老人家，同佢合作獲益良多，雖然佢個樣好惡，成日演奸角，但其實係好好嘅老人家，奸人堅形象深入民心，係香港Icon之一，佢嘅形象永遠會喺香港人心目中。」粵語片時代與堅叔合作無間的陳寶珠亦說：「好可惜，好唔開心，佢係一位好令人懷念嘅前輩，係好先生、好爸爸、好老公，好提攜同照顧後輩。」
謝賢：外表兇性格純
一班前輩演員謝賢、胡楓及李香琴均感惋惜，琴姐說：「呢幾年堅叔病咗好耐，我成日話探佢都係得個講字，真係冇用！佢雖然成日演奸人，但其實係好客氣同友善，武功又叻。記得有次同佢拍武打戲，佢要按住我，因為太大力，按完之後我成隻手瘀咗！」胡楓亦大讚堅叔為人好好。謝賢指堅叔外表兇惡，但性格好純，當年被其惡形惡相嚇窒，認識後知他為人善良，四哥說：「人總有生老病死，96歲都係笑喪，知道堅叔安詳離開都感安心。」又表示必會到其喪禮鞠躬。而曾於劇集扮演奸人堅的黃子華說：「佢永遠都咁有型，永遠懷念佢。」