喺小小So行埋去之前，啱啱有個姐姐仔走到Kathy面前同佢傾偈，好似係傾一啲有關Fashion嘅話題，小小So本來唔係好在意，但突然間聽到Kathy姐拉高嗓子喺度訓話。

姐姐仔：你呢件衫係咩牌子？

Kathy：Stella McCartney。

唔知點解個姐姐仔又無喇喇問起Stella McCartney點串。

Kathy：S-t-e-l-l-a……（諗咗一陣，跟住高八度好忟憎咁話）哎吔！呢隻牌子咁出名你都唔識串㗎？

雖然Kathy滿口責備同唔耐煩嘅語氣，但勁就勁在佢全程都笑容滿面，如果唔聽佢哋嘅對話內容，仲以為佢同個姐姐仔傾緊密偈或者講緊是非，呢啲先係真正嘅模界「一姐」風範，就算幾激氣都唔會失儀，兼且仲笑面迎人添！不過小小So就覺得Kathy姐未免棋差一着喇！點解？因為橫掂佢都串咗開頭嗰半截出嚟，無論幾激氣都好，點都應該串埋嗰後半截畀人聽嘛！如果唔係畀人懷疑佢其實係唔識串個品牌名，先至向人訓話嚟「遮醜」，整壞自己個名模招牌咪仲弊！