講到圈中「大頭蝦一族」，真係不得不提張文慈（Pinky），呢個靚女個樣生得精明，不過私底下就烏龍百出，㩒完機唔記得攞錢不在話下，最厲害係佢竟然着咗鴛鴦鞋去開工，全程可以懵然不知，最終咪畀黃秋生「揭穿」咗囉！
Pinky好在大情大性，佢日前同小小So講電話，就自揭瘀事話：「嗰日着咗對鴛鴦鞋去開工，秋生好眼利，指住我對腳話：『乜咁樣着好潮咩？』我先望一望自己，原來着咗一對黑靴，但一隻尖頭、一隻闊頭嘅！側邊有人聽到，仲講笑話唔識我，叫我行開啲添！」
小小So：最終點收科呀？
Pinky：咪惟有即刻叫個助手返屋企幫手搵鞋嚟換囉！不過呢件事都未算最瘀！
小小So：吓？仲有激啲嘅？
Pinky：我仲試過有次反轉咗件衫着，出到街人人回頭望我幾眼，起初都唔知發生咩事，最終先發現自己瘀咗！咪即刻衝入洗手間搞番掂佢囉！