本文重點
陳冠希返港多日均高調出巡，昨日跟契爺黃秋生飲茶敍舊時，大批記者上前採訪拍照，秋生被壹傳媒記者採訪手法辣㷫發生衝突，事後秋生在電話中炮轟壹傳媒記者行為挑釁，簡直是「流氓」的行徑，非常勞氣！
陳冠希（Edison）返港後行程可謂密密麻麻，昨日又再次外出，身穿一件Slogan Tee，上面寫有「YOU KNOW YOU'RE NOT RIGHT」（你知你唔啱），原來Edison相約了契爺黃秋生在銅鑼灣怡東酒店中菜廳歎茶，大批記者蜂擁入內採訪拍照，期間黃秋生跟壹傳媒記者發生衝突，現場一片混亂，酒店保安即時驅趕記者，Edison趁混亂先行由側門離開，而壹傳媒記者追問Edison：「係咪你叫秋生打我？」Edison兩次回應對方說：「我點會做埋啲咁嘅嘢？」Edison離去後，該名壹傳媒記者隨即報警求助及要求驗傷。
「佢咄咄逼人」
黃秋生知對方報警後顯得非常勞氣，他說：「當時個記者揸住部機衝到好近，直頭隊到塊面咁滯，影相就影相，錄乜影呀？仲要一路係咁影，嗰度係私人地方嚟(口架)！」
秋生續說：「佢咄咄逼人，我最終忍唔住氣用筷子敲佢部機，乜打到佢隻手咩？我見佢冇郁，仲繼續影，所以我以為我係打中部機，如果打中佢隻手，佢點會郁都唔郁？機又唔跌？」
秋生指當時其他記者均離遠拍攝，只有壹傳媒記者走得很近，當時Edison亦有開口勸他不要動氣，他說：「個記者咁做係好滋擾，記者有採訪Guide Line，唔好過咗條界線，唔好做出流氓嘅行徑，你唔斯文，咁大家都唔斯文。」最後秋生大讚Edison大個仔，成熟不少，今次見面只是傾家常事。