阿嬌心情靚：唔關我事

鍾欣桐（阿嬌）尋日率領一班師弟師弟包括鍾舒漫（Sherman）、詩雅、洪卓立（Ken）同李逸朗等出席《英皇十周年回顧展覽會》閉幕禮，精神煥發嘅阿嬌以神秘嘉賓身份出現，擔任遊戲評判。當主持人問Sherman嗰組定係Ken嗰組個蛋糕靚啲，全場嘅歌迷即刻嗌：「阿嬌最靚！」氹到佢笑不攏嘴。公司十周年，阿嬌激讚英皇係最溫馨嘅公司：「加入公司之後學咗好多嘢，好多人畀支持同信心我，同阿Sa合作好開心，感覺好似成個Family咁！」

阿嬌懶理陳冠希傳情變，現時專心準備舞台劇。

洪卓立落台與歌迷合照，慶祝出道兩周年。

演舞台劇勁緊張

巧合地同陳冠希（Edison）着埋同一個潮牌COMME des GARCONS PLAY系列上衣嘅阿嬌，話知道對方返咗香港，提到Edison嘅情變傳聞，佢就話：「係咩？唔關我事。（唔想理？）其實我真係唔想知。（聯絡？）唔會，完全冇關係。（心情有冇影響？）返嚟都唔關我事。」問佢有冇同栢芝慶祝生日？阿嬌話：「我唔知佢生日，我淨係知祖兒就嚟生日咋！」

阿嬌話嚟緊參演舞台劇《Halo阿爸》（暫名），飾演資深舞台劇演員陳淑儀嘅女兒：「第一次做舞台劇好緊張，因為唔可以NG，依家讀緊個好厚嘅劇本。」另外，尋日大會順道幫Sherman同Ken慶祝出道兩周年，肺積水未好番嘅Ken唱歌嗰陣，歌迷全程陪住唱，場面溫馨！