張敬軒前年憑一曲《酷愛》極速上位，更於去年在紅館舉行處男個唱，場場爆滿，可謂光宗耀祖，惟負面新聞隨即接踵而來，除被封為「張勁囂」外，又曾試過「噴錯火」喪鬧電台公關，需公開致歉。事過境遷，軒仔表示以後說話要經大腦：「仍然有進步空間，特別係做呢行，措辭方面要經大腦，講嘢要謹慎，經過前年同舊年嘅事，我處理新聞能力強咗，我了解傳媒工作性質，唔好成日主觀意識諗住人哋針對自己，無論係唔係『繫鈴人』，自己要做『解鈴人』。」有原則的他不諱言要保護同事，亦不能「冇咗」自己，他說：「唔好太驚會蝕底，入得呢行，就知道呢行遊戲規則，我份人唔識死，感恩嘅係，呢兩年有呢啲新聞，令我學識呢行遊戲規則，同埋感激傳媒朋友嘅包容。」軒仔續說：「歌手都係人，都希望生意興隆、飛黃騰達，但情緒起伏有時難免。」
觀眾接受王菀之
對於Ella亦曾因衰多口而惹是非，軒仔力挺對方：「大家係同行，Ella只係男仔頭性格，以前同佢住埋同一幢樓，都會傾吓偈，當然作為藝人講嘢要謹慎，依家有個新趨勢，就係有啲新聞會搵好多局外人回應，所以可以唔答就唔答，唔關自己事嘅都唔回應太多。」
另外，軒仔的新碟《Love & Living》銷量理想，問到現實中的感情生活是否同樣理想？他笑說：「冇乜特別。（冇緋聞？）搵緊。（成年都冇乜緋聞？）大家已經接受咗王菀之同Kenny（關智斌）。」
官恩娜（Ella）性格心直口快、敢怒敢言，多次語出驚人。於本年2月初，無綫爆出風化疑案，鬧得滿城風雨之際，Ella突然「加把嘴」，爆料指有男藝人借醉非禮一名女藝人，並試圖有進一步行動，此番言論觸怒無綫高層，Ella被指博宣傳，更被急召交代事件。事隔三個多月，萬箭穿心的Ella坦言以後會慎言，：「唔想影響到人，有時無心快語，搞到其他人估嚟估去。」她表示要學懂人情世故，問到是否「冇腦」？她笑說：「唔係冇腦，只係冇用個腦啫﹗我唔係特別蠢，只係懶用腦。（搵人吐苦水？）公司同事囉！好難搵其他人吐苦水。（自我檢討？）講錯嘢梗係要檢討啦！」
迴避戀情嗌救命
Ella自言是個「真」人，她說：「唔想變成計算嘅人，我唔係一個咁有機心嘅人。（惹是非？）都覺㗎！但有時有啲嘢唔係我做出嚟。（嬲爆？）我又冇咁易嬲，我唔會擺上心，但最緊唔好影響我身邊朋友，我衰我事，但畀人大做文章，影響到朋友就唔好。」談到張敬軒曾被指態度囂張，Ella力撐對方：「識佢唔係啲咁嘅人，佢好Nice，唔會扮大牌！」
Ella性格豪邁，容易招惹緋聞，但問到感情現況，她表示仍「交白卷」，還幽幽地說：「我邊有仔？救命！冇仔要我。（感情冇着落？）冇呀！仲唔嚇死啲人咩？（唔拍拖？）睇吓有冇有緣人啦！（擇偶條件？）同做呢行冇關，咁我可以睇到另一個世界。」Ella予人性感感覺，她聞言即說：「大把人性感過我啦！睇場合而性感，唔會成日着低胸吊帶裙囉！每個女人都有性感潛質，我覺得舒淇、鍾麗緹最性感。」