詩雅美人計氹狗沖涼

詩雅有一隻三個多月大寵物唐狗「比爾」，由於比爾未試過扮靚美容，詩雅就膽粗粗去到西營盤第二街一間寵物美容店，化身索爆寵物美容師幫愛犬大變身。

梳毛：詩雅替比爾梳毛時，牠周身郁，詩雅要不停叫「乖啲」，又逗牠的下巴氹牠，才令比爾靜下來。	剪趾甲及剃肚毛：比爾有六隻腳趾甲，最好剪走沒用的腳趾甲，以免將來長大後易絆倒。而詩雅因怕剃損愛犬的肚，相當騰雞，最後要Ryan出手為比爾剃肚毛。	清潔耳朵及眼睛：詩雅用棉花包實剪刀尖端位置，然後蘸了洗耳水替比爾清潔耳朵，難得比爾出奇地聽話。

據寵物美容師Ryan表示，寵物美容的基本步驟包括梳毛、剪趾甲、剃肚毛、清潔耳朵和眼睛、沖涼和烘乾等，過程看似簡單，但實戰時困難重重。當中令詩雅最難應付的，莫過於替比爾沖涼，她說：「比爾一見到水就失控，佢驚時我又驚，一見佢驚到震我就心軟，有時索性唔沖。」當詩雅將比爾放入浴缸時，比爾已急不及待「速逃」，要詩雅先餵牠零食，又攬又氹，才令牠勉強就範，但當暖水淋到身上時，比爾又開始郁身郁勢，令詩雅的上衣也濕了一片，狼狽又無奈，亦禁不住扁嘴。

沖涼：比爾最怕沖涼，要詩雅出動美人計餵牠吃零食，比爾才「畀面」沖身，但都弄濕了詩雅的上衣。	不正確的抱狗姿勢	正確的抱狗姿勢

經過一輪「美容角力」，詩雅不諱言感受到原來要成為寵物美容師，都要下一輪苦功：「做寵物美容師一啲都唔簡單，最難就係訓練耐性，我本身冇乜耐性，自己嘅寵物就話易應付，但其他寵物未必輕易駕馭，我訓練動物好渣，有時比啲貓狗蝦番轉頭。」

兒時志願做獸醫

詩雅對做寵物美容師感興趣，兒時更曾渴望做獸醫：「但我怕見血，而且做獸醫唔只應付貓狗，仲有其他動物都要識醫，難度仲高。」Ryan表示要成為寵物美容師需經過考試及實戰經驗才算攞正牌，不諱言寵物美容師須具備耐性和愛心：「寵物美容師某程度上算係厭惡性工作，因為危險性又高，又易污糟，同埋易感染皮膚病，所以事前要做足安全措施。」

寵物小知識

原來詩雅抱起愛犬比爾的方法並不正確，Ryan說：「詩雅向前抱狗嘅方法，容易令狗嘅腳趾抓損佢，亦令隻狗嘅前腳負擔變重。佢應該打橫抱起隻狗，托起佢四隻腳就最穩陣。」