李珊珊帶波衝鋒猛男四散

為迎戰「籃總名人邀請隊」，今年明星隊陣容強勁，包括高鈞賢、李逸朗（Don）、陳家樂、葉文輝（啤梨）、盧惠光、范振鋒同苗僑偉個乖仔Murphy出賽，當中以高鈞賢球技最犀利，為明星隊攞咗11分，堪稱隊中嘅神射手！原來高鈞賢同啲外國朋友打開籃球聯賽，經驗豐富：「我第一次喺咁多觀眾面前打波，好開心！台灣有明星籃球隊，希望香港都搞明星隊，大家切磋下球技！」

陳柏宇（左）與啤梨落場前先打牙骹。

高鈞賢前日展示額頭傷勢，頗為嚇人！

至於全場唯一女將李珊珊，原來讀書時係籃球隊，所以有姿勢有實際，佢仲笑笑口話：「唔驚喎！啲男仔好有風度，見到我帶波都散開晒！」

李逸朗（左）與陳家樂老友鬼鬼，球賽不影響友誼。

趙世曾落場比賽有心有力，不比年輕人遜色。

陳柏宇冇失禮

另外，同場嘅陳柏宇球技亦有番咁上下，入咗兩球三分波，相當唔錯，不過佢話：「我太懶喇！已經好耐冇打波，好彩都冇失禮人！」最難得係年紀唔細嘅趙世曾，落場帶波又上籃，活力十足，而敵方對佢都好尊敬，特登放慢節奏畀佢入波。