Kelly狂食谷巨B暴肥17磅

準媽咪陳慧琳（Kelly）的預產期是今年8月，昨日她接受《巴巴閉邊個夠我查篤撐》電話訪問時，自爆肥了17磅，更形容肚皮「鑼咁大」！不過，她打算繼續增磅：「我想佢大啲，所以一日最少食四餐！」一索得男的Kelly又轉口風，揚言考慮生多個：「如果得嘅，我都想生多個。」

熱愛小朋友的Kelly佗仔佗上癮，改口風打算繼續生。

為了生個肥B，Kelly早前開工時密密食。 資料圖片

恐變囉唆媽咪

由於腹大便便，Kelly已暫停工作，因為站得久會腳軟，但卻如常為新碟錄音，她說：「因為可以坐喺度錄。」她指胎兒相當活躍，每晚都勁踢她，令她冇覺好瞓。Kelly又搞笑地表示，最驚自己變成囉唆媽咪：「我驚佢好曳，要鬧佢、發脾氣！」她透露囝囝的中、英文名已想好幾個，但待BB出世後才決定，而BB房亦已準備就緒：「有親戚喺澳洲寄尿片畀我，啲衫仔去到6個月都有，仲有好多玩具，成間房塞滿晒。」

主持查小欣指BB對得多邊個就似邊個，Kelly聞言即搞笑地說：「好驚似柴九同鄧萃雯！」原來她每晚都在家追看劇集《巾幗梟雄》，查小欣叫她多照鏡，她即自嘲：「咁樣衰，唔照！（攞老公張相對住？）佢真人靚仔啲。」