亞視昨晚以台慶硬撼《巾幗梟雄》大結局，並於之前舉行酒會，除了出動全台藝人迎戰外，還有33F童顏巨乳女神郭書瑤（瑤瑤）及34E 劉欣宜（E Cup Baby）助陣。E Cup Baby低胸露腰兼露長腿，「峰」芒畢露！相反瑤瑤竟半封胸示人，只好以勁歌熱舞挽回聲威，性感欠奉，勝在跳舞時又跪又瞓兼脫下小背心辣㷫全場，連陳啟泰都不禁驚嘆：「睇到心都凸埋！」
瑤瑤與E Cup Baby齊聲強調服裝是由公司安排，E Cup Baby還風騷地讚瑤瑤：「佢雖然可愛，但唔係無知同冇用腦㗎！（驚佢嚟香港搶生意？）唔怕！各補所長嘛！」而瑤瑤自覺打扮既中性又性感，並否認酬勞高才肯性感示人。亞視本地薑中，只有袁小曼及陳少霞打扮較性感，陳少霞更暗寸大胸外援：「大胸都有煩惱，我以前都有同學係D同F㗎！生完就鬆晒！」袁小曼亦表示不羨慕瑤瑤胸大：「我條腰幼，唔可以太大。」另外，鮑起靜得悉硬撼《巾》劇時，衝口而出：「唔係嘛？咁咪弊？」其後才補鑊說：「大家都弊傢伙！（擔心收視？）唔緊要，各有各做。」
有指09年亞姐三甲可獲香港身份證及百萬獎金，葉家寶解釋只是誤會：「不嬲得獎亞姐係內地佳麗，我哋都會幫佢哋申請工作身份證。百萬獎金係誤會，佢哋嘅獎金加獎品總值三百萬。」
