英格蘭足總盃決賽今晚10:00開戰，「黃金戰車」車路士同「拖肥糖」愛華頓，喺溫布萊球場火併爭冠軍！今日搵嚟兩位人氣偶像「阿Sa」蔡卓妍同古巨基，同大家分享一下佢哋嘅心水預測，估唔到佢兩個唔止齊齊睇好車路士，仲非常欣賞林柏特添！
古巨基：「平時開工日忙夜忙，好多時都唔夠瞓，但係點解都仲頂得順？咪就係抱住車路士『鐵人』林柏特嘅比賽精神囉！成隊車路士我最欣賞就係佢，因為佢冇話恃住自己有技術，或者喺隊波度有地位而喺場上錫力，只要領隊派佢上陣就會搏晒命。加上平日練習認真，狀態保持到自然就少受傷，有佢喺度隊波中場線嘅演出先保持到咁穩定。林柏特除咗傳送了得，遠射腳頭亦有一手，話唔定喺呢場決賽，就係靠佢呢瓣撒手鐧贏波，小勝1:0都唔奇㗎！我未知趕唔趕得切喺開波前返到屋企，但係我都想睇嘅，幫『林伯』打氣啊！」
阿Sa：「車路士陣中粒粒皆星，咁多勁人，梗係睇好佢哋攞冠軍啦！何況佢哋今季一個盃都未有喺手，戰意絕對唔使懷疑，我估佢哋今場可以贏2:0，Sure Win！車路士咁多球員入邊，我比較鍾意林柏特，事關佢射又得、傳又得，仲要鬼咁好體能，幾乎車路士比親賽都見到佢上陣咁滯，仲唔係鐵人一號？佢嘅比賽風格好值得支持。唔係講笑，足總盃我由細睇到大，今屆決賽我會同朋友去卡拉OK邊唱K邊睇直播，一手揸住杯雜果賓治、一手剝住花生，咁睇波先過癮吖嘛！」