本文重點
【本報訊】最近被指與陳偉霆（William）分手的Angelababy，日前抽空帶狗仔洗白白，她透露曾因冷落愛犬而被咬，更內疚地說：「好驚佢唔再理我！」
日前有指叮模一姐Angelababy與混血男模James在酒店談心，因而傳出與William感情亮紅燈，雖然她以「全部都係假」作澄清，但日前出席活動後，她未有與兩位緋聞男友見面，反而急急腳返屋企，帶愛犬「BB」到寵物美容店洗白白！
巧遇秀姑叻哥
Baby當日一身便服、化上淡妝出街，雖然非「女神Look」，但沿途仍被不少途人認出。她的拖狗技術雖然非常熟練，但有得去街街的「BB」High得像甩繩馬騮，最終要花幾倍時間才抵達寵物美容店。依依不捨地留下「BB」後，Baby與女助手睇寵物玩具消磨時間，又在櫥窗前細看其他狗仔，巧合地，黃杏秀與陳百祥竟在櫥窗外出現，雖然望着同一隻小狗，但卻未有發現對方。
經過悉心打扮後，「BB」成個靚仔晒，乖巧地讓Baby拖上的士返家。記者事後致電Baby，她坦言已很久沒有陪伴愛犬：「上次去完日本返嚟之後，佢一見到我就咬，表達佢嘅不滿，好驚佢唔再理我！所以今次返嚟，我堅持帶佢扮靚靚，希望佢知道我仲係好錫佢！」