播放本新聞相關短片

懷胎七月冇時停 陳慧琳學孕婦瑜伽助產

本文重點
【本報訊】潮媽陳慧琳(Kelly)依家有7個月身孕,話過唔會坐定定待產嘅佢,早喺兩個月前已經開始上800蚊一堂嘅孕婦瑜伽班,希望增加身體柔軟性同平復佗BB嘅不安情緒,為生產做好準備。

日前Kelly以一身便裝打扮,挺住大肚去尖沙咀一間瑜伽學校,見佢紅粉緋緋,估計係啱啱做完運動出嚟。據知,Kelly喺網上得知孕婦瑜伽對大肚婆有益,所以兩個月之前已經開始上堂,不過為免受到騷擾,佢惟有選擇收費較貴、約800蚊一堂嘅一對一指導班,每星期仲上足三堂,每堂約75分鐘,相當勤力。

冇水腫佗得靚

記者昨日致電Kelly經理人鍾珍求證,佢話:「係呀!Kelly返緊瑜伽班,不過畀傳媒知道就冇得返,惟有改喺屋企做,因為佢唔想畀人影。」佢話Kelly知道孕婦需要做適量運動,但佢就嫌游水又凍又麻煩,所以先揀學瑜伽。問到Kelly現況,鍾珍就多謝大家關心,仲話Kelly依家身體好好兼好靚,冇出現大肚婆嘅水腫問題,而且冇特別進補,只係食有機同含有DHA嘅健康食品。

音樂組