【本報訊】呢個星期真係好波連場！繼今朝凌晨上演嘅歐聯決賽之後，嚟緊星期六晚10:00，英超勁旅車路士同愛華頓，就會喺溫布萊球場爭奪足總盃，今日先搵嚟兩位「分量十足」嘅口靚模，「動漫Maggie」李曼筠同「美少女廚神」Rainbow胡心諾，講吓佢哋對呢場足總盃決賽有咩睇法。
Rainbow：「同好多球迷一樣，我好相信車路士可以捧走今屆足總盃，比數係2:0咁上下啦！呢隊波之所以咁勁，其中一個原因就係人腳夠平均，冇話邊個特別勁，個個都咁勁！如果就到時間，成班朋友一邊睇波、一邊開Party就最開心喇，仲要在場有啲識波嘅朋友喺度，一齊討論吓、拗吓先夠過癮。星期六晚我會盡量抽時間睇直播，之前逢親有大賽我都會睇，今次應該唔會例外。」
李曼筠：「我會支持愛華頓贏2:1！原因係我知道好多朋友都睇好車路士，所以我決定鋤強扶弱，支持少啲人捧嘅愛華頓。呢隊波有個特點，就係好多個球員嘅髮型都好突出，其中比利時國腳費蘭尼嘅爆炸頭最吸引，佢去到邊都可以見到佢，夠晒搶鏡，睇嚟我遲啲整頭都要參考吓先得。哈！哈！之前都試過同成班朋友去Cafe睇波，感覺唔錯，嚟緊星期六去邊度睇就未知，但係我一定會睇，10:00開波吖嘛！」