依家做藝人除咗要識唱歌做戲，仲要有好好嘅口才去應付記者訪問，呢方面陳奕迅（Eason）絕對係表表者，佢把口直頭叻過晒啲Sales呀！有日SoSo姐喺電台撞到Eason同林子祥（阿Lam）喺度密斟，原來Eason向阿Lam介紹緊佢部新買嘅相機，順便喺阿Lam呢位大前輩面前Show佢嘅攝影作品。
SoSo姐都好想睇吓Eason啲相，於是就行埋佢哋度，點知Eason已經玩完部相機，喺褲袋度攞咗支好似USB手指咁細嘅嘢出嚟。SoSo姐心諗附近又冇電腦，佢攞支USB手指出嚟做咩呢？Eason話呢個原來係佢新買嘅iPod Shuffle，仲好得戚咁話大家一定估唔到添！佢又攞埋個耳筒出嚟畀大家試聽，仲讚唔停口話部機高音好清、低音非常準，佢仲話佢買咗600蚊，不過依家買應該會再平啲，搞到現場唔少人都話有意思想買番部，所以話Eason把口真係叻過Sales。