近幾年嘅台劇走勢稍稍下滑，主要原因係畀日劇同韓劇追到氣咳，不過依家風水輪流轉，台劇嘅熱潮近排又返晒嚟，仲好似豬流感（H1N1甲型流感）咁迅速擴散，除咗小小So變咗台劇擁躉外，原來啱啱同人氣偶像賀軍翔拍完台劇嘅蔡卓妍（阿Sa），都唔小心「中招」，喪煲由阮經天同楊謹華擔正嘅台劇《敗犬女王》過日辰，仲要煲到一發不可收拾！
小小So：阿Sa，搞緊乜呀？
阿Sa：煲緊台劇呀！睇緊《敗犬女王》呀！
小小So：吓！依家先煲？會唔會Out咗啲？
阿Sa：梗係唔Out啦！其實我先係追睇台劇先鋒呀！當年我同阿嬌（鍾欣桐）喪煲F4嘅《流星花園》，追到廢寢忘餐，又成日同啲同事討論劇情，個個當正自己係女主角「杉菜」呀！
小小So：咁你覺得《敗》劇好唔好睇？
阿Sa：簡直一流呀！我中咗「敗犬毒」，試過由晏晝五點，煲到凌晨五點先捨得瞓，足足煲咗一個對，中間只係用咗一個鐘醫肚、沖涼同去廁所，唔睇真係冇話題。
小小So：咁你係唔係敗犬女王呢？
阿Sa：梗係唔係啦！我都未到呢個年齡層，哎呀！唔同你講咁多喇！我要繼續我嘅「敗犬」生活呀！係咁先！