楊恭如積被問戀情發老脾

文：影視組　攝：唐豁莊上海傳真

兩位晶女郎劉洋（左）及孟瑤盛裝出席活動。	丁子高自言冇叫千嬅做女友。	羅霖透露細仔早前在內地患腸胃炎入院。

羅霖、丁子高、楊恭如同孟瑤前晚喺上海出席施華洛世奇活動晚宴，楊恭如話依家冇開工，本來打算去日本旅行，點知嗰邊爆發豬流感（H1N1甲型流感），所以被迫擱置。期間，有記者問到感情問題，楊恭如唔多想答，只係話阿媽冇催，自己亦唔心急，仲好唔耐煩咁話：「之前咪講過囉！」不過講完冇耐，佢又同大家分享擇偶條件，話揀男友最緊要愛屋及烏、有上進心同埋要啱Feel。問佢之前啲男友係咪唔啱Feel，佢就話：「如果冇Feel就唔會一齊，但有Feel亦唔等於可以到尾。」佢仲話同以前嘅男友冇見面亦冇來往，免得畀人見到又大做文章！

丁子高冇講過娶千嬅

至於早前有傳丁子高喺訪問度話會娶楊千嬅，佢就誓神劈願話根本冇正式做過訪問，仲話對呢啲新聞都慣晒，EQ變得好高，而目前就以事業為重。記者講笑話千嬅「有排等」，丁子高就齋笑唔答，問到係咪嗌千嬅做女友，佢就話：「你覺得我會唔會豬到咁？」

另外，喺上海住咗幾個月嘅羅霖，懷疑自己有輕度抑鬱，仲有啲不滿內地嘅醫護人員。