李曼筠（Maggie）雖然年紀細細，但母性已經好強烈！有日SoSo姐同佢去郊遊，嗰度環境優美，空氣清新，可惜映入Maggie眼簾嘅就只有四圍嬉戲嘅細路仔！Maggie一見到啲BB，就立即忘記咗同佢傾緊偈嘅SoSo姐，一支箭咁標埋去同啲細路玩同影相，尤其嗰啲金髮兼有個肚腩仔嘅外國細路就最得Maggie歡心，Maggie同佢哋玩到興起，仲學人哋喺地上面兩腳爬爬，完全冇理會自己係無數電車男心目中嘅女神，搞到周圍啲人睇到眼都凸埋，真係服咗佢嘅投入度同精力！
除咗鍾意玩細路，Maggie仲好鍾意玩自拍，只要佢興起，隨時隨地都可以拎起部相機嘟嘴自拍，佢仲好有創意，識得用唔同嘅道具配合唔同嘅甫士。例如佢喺地上面見到一塊葉，佢會即刻拎起塊葉做道具，如是者石仔、樹枝甚至路邊嘅一條草，都可以畀佢玩餐飽，咁識得物盡其用，真係有晒做呢行嘅天分！