啲人成日話諸葛梓岐唔肯搭巴士係公主病，又覺得有錢人入娛樂圈拋頭露面係一件好稀奇嘅事，其實計小小So話齋，娛樂圈真係大把有錢人，佢哋好多時加入娛樂圈都係為興趣，好似椋名凜咁，佢屋企原來係醫學世家，而且阿媽仲係醫院理事長添！但係有米嘅佢都一樣走去搭巴士轉港鐵，真係能屈能伸。
小小So：你阿媽係醫院理事長，咁你睇醫生有冇着數？
椋名凜：冇！公事公辦嘛！不過我可能比其他人幸運囉，好似最近豬流感（H1N1甲型流感）咁盛行，行外人可能淨係買口罩頂住，但我媽咪就攞咗最先進嘅防毒面罩同保護衣畀我！
小小So：據聞你阿爸賣專業醫學儀器喎，點解你唔索性去讀醫？
椋名凜：做醫生又唔係做生意，使乜繼承父業呀！
小小So：照你咁講，你屋企實好有錢啦！咁你係咪會好似啲「公主」咁，死都唔肯搭巴士？
椋名凜：咁又唔係！我喺日本都有搭JR！而且嚟得香港做嘢就預咗由低做起，所以平時都係巴士港鐵代步，唔會成日搭的士，小數怕長計！