向來官仔骨骨、睇落弱不禁風嘅黎諾懿，將會繼王祖藍、謝天華之後殺入大銀幕，演出由羅守耀投資嘅新片，片中仲會同廖碧兒合演姊弟，演黑社會家族成員，仲有唔少武打動作鏡頭。
唔怪得之最近黎諾懿同小小So講要頻頻練習身手，仲要一改平時個斯文嘅造型．留長頭髮之餘，仲要曬得黑黑實實，又要去做Gym練肌肉，務求形象要霸氣。唔怪得之前小小So見佢成個人都唔同晒．冇咗個斯文Look之餘，仲愈來愈有男人味道，睇到小小So流晒口水，黎諾懿實行可以轉行走型男路線。不過做型男一定要付出，所以黎諾懿同小小So講，佢有咁嘅身形，真係付出唔少，每日要狂做運動谷肌肉之餘，又要控制住營養飲食，咪話唔辛苦。
小小So ：嘩！黎諾懿你型咗好多，而且又大隻咗！
黎諾懿 ：鬼咩，我為咗拍電影，日日操肌肉，而且仲食啲有營養嘅嘢，日日做運動做到鬼咁攰。
小小So ：平時好少運動㗎？
黎諾懿 ：唔多囉！依家好似做番晒我咁多年冇做過嘅運動咁，咪話唔辛苦，型男真係唔易做呀。