張達明因為工作繁忙，加上之前囡囡試過畀狗整親塊面，所以曾經發誓唔再養狗，可惜佢實在太鍾意狗，加上老婆同囝囝喺隔籬「推波助瀾」，所以佢又再跌入咗養狗嘅陷阱！不過估唔到達明除咗份人搞笑，連養狗都搞笑過人！
達明同SoSo姐講，之前有個朋友猛咁慫恿佢收養柴犬，話啲柴犬夠晒珍貴，點知去到朋友度拎隻狗返屋企時，先發現「貨不對辦」，皆因隻狗啲腳仔好鬼短，擺到明就係哥基。原本達明諗住退貨嘅，不過因為老婆鬼咁鍾意哥基，惟有心軟照養囉！點知帶隻狗去打防疫針嘅時候，個獸醫竟然話隻狗既唔係柴犬、亦唔係哥基，而係一隻唐狗！令到「閱犬無數」嘅達明當堂大跌眼鏡！
本來「事與願違」已經令達明牙痛咁聲，不過最令佢擔憂嘅係養唐狗嘅後遺症：「我諗住養迷你狗之嘛！依家整隻唐狗嚟，大咗真係唔知點算！」佢仲話原本同樣係愛狗之人嘅吳鎮宇話幫佢收留隻狗，點知畀囝囝投反對票，仲話如果真係咁做，就要喺鎮宇屋企出面紮營咁話，達明惟有即時「投降」。其實計SoSo姐話，養多隻狗對達明嚟講根本唔成問題，但估唔到作為一家之主嘅佢，竟然要受老婆同囝囝嘅「操控」，幾時都話廿四孝老公同老竇唔易做㗎啦！