小小So一向好欣賞鄧萃雯，出道20幾年，都默默做唔搞新聞，早年嗰部《金枝慾孽》已經證明佢嘅演技已經修成正果，近排佢同黎耀祥嗰部《巾幗梟雄》收視唔錯，小小So聽到有唔少人大讚好睇，仲話雯女飾演嘅四姨太一角好正！其實雯女成績有目共睹，係因為佢平時四圍取經！
點取經？雯女平時好鍾意同人傾偈，小小So有時同佢傾偈都傾得好開心，因為雯女真係一個好好嘅聆聽者，會慢慢聽、慢慢同你分析，真係傾一晚都唔夠！有次小小So講開有個親人仙遊，雯女婉言安慰之餘，仲好似個心理輔導員咁，慢慢剖析小小So嘅情緒，期間仲拎住支筆問：「當時你聽到親人過身，你諗緊咩？個心係點？係即時喊，定係個腦空白一片？我想記住呢啲感覺，等我做戲時更加知道點把握情緒。」
或者大家睇到呢度，會覺得好奇怪，但小小So好明白雯女唔係假意安慰嚟「取經」，只係佢平時會好留意生活上嘅人同事嘅細節，同埋對於一個愛做戲嘅人嚟講，人生係真正嘅舞台，將生活嘅感覺融入演技，係一件唔容易嘅事。雯女咁尊重演員呢個身份，小小So真係好敬佩！