本文重點
黎明昨日以新郎Look出席演唱會記者會，收到贊助商送上婚戒！雖然他稱今年是結婚好年，但自認公私分明的他，拒絕學陳慧琳（Kelly）在個唱上宣布婚訊！
黎明（Leon）將於7月中假紅館舉行4場《Dream Wedding Leon Live Summer 09》演唱會，昨日收身成功的他穿上白西裝襯黑西褲，十足新郎哥！贊助商送上一對放在棉枕上的白金戒指，Leon即好奇地問：「點解放喺枕頭度？」贊助商即更正指「戒指枕」並非枕頭，但亦可寓意同諧共枕及美夢連連。
心情甚佳的Leon坦言，今年是結婚好年：「今年雙春兼閏月，知道好多人結婚，我隻新碟有好多情歌，每個人都有夢想嘅婚禮……（喺個唱度宣布結婚？）冇冇冇！作為Leon，入行咁耐好專業，開演唱會係畀觀眾睇，唔會有任何私心嘢，尤其係做宣傳嗰種！（陳慧琳都係咁！）有冇男士例子？證明男人心唔同女人心囉！」問到女友樂基兒可會捧場？他又發揮其專業精神說：「今日唔講，好Clear咁講演唱會！」
跳舞保證唔難頂
Leon透露個唱上會跳「1個鐘同5分鐘之間時間」的舞蹈，保證有驚喜：「唔會令大家難頂，係好嘢，可以過到人哋又過到自己嗰種！」一向不諳跳舞的他，原來節食才是最痛苦的事：「我最鍾意嘅咖喱飯、斑腩炒飯、煎到兩邊金黃色嘅菜甫蛋都冇飯送、仲有錦滷雲吞……只可以食菜同山竹牛肉咋！」