本文重點
張栢芝尋日撇甩老公謝霆鋒同囝囝Lucas，喺台灣睇浴室用具，雖然佢十問九唔應，但就心情勁靚，莫非為喺台灣置業探路？
栢芝尋日同細佬栢文同經理人，喺台灣街頭出現，今次係佢一個月內第三次訪台，睇嚟佢都幾鍾意台灣！栢芝尋日頭戴鴨嘴帽，身穿短褲，打扮非常Casual。期間佢同友人有講有笑，仲特登去浴室用品店選購用品，心情勁靚！
全程封口笑咪咪
問到今次訪台係咪出席慈善活動？栢芝未有回答，只係禮貌咁微笑一下。再問佢為乜又訪台？佢都淨係保持微笑，冇答任何嘢！不過栢芝曾經讚台灣係個好地方，仲話想霆鋒喺台灣買樓送畀佢做生日禮物，莫非佢今次訪台，就係為置業一事探路？
另外，栢芝同徐熙娣（小S）鬼咁Friend，有傳佢今次訪台，係小S碌人情卡，希望佢出席亞視台慶活動，不過栢芝經理人就否認咗，仲話冇聽過咁嘅事！