張敬軒除咗唱歌好聽之外，佢嘅「竹竿」身形亦係招牌之一，不過有時真係人不可以貌相！軒仔雖然咁瘦，但其實佢不知幾擦得，有次SoSo姐約佢食飯，佢提議食漢堡包。SoSo姐初時都覺得怪，諗住佢油都冇多滴，點解會對油淋淋嘅漢堡包有興趣呢？點知坐落至發現更加唔妥，軒仔竟然可以一個人食晒兩人份嘅漢堡包，睇到SoSo姐眼都凸埋！
好彩上天始終係公平嘅，SoSo姐有日收到風，話軒仔原來有個肚腩仔，大家之所以唔多覺，係因為佢識得着衫遮住啫！雖然軒仔成功「瞞天過海」，但據聞佢為咗唔想有日畀人踢爆未到中年就已經發福，所以下定決心減肥，順便強身健體咁話！軒仔咁做都啱嘅，做得公眾人物，各方面都應該盡善盡美，咁先有專業精神嘛！