小小So喺娛樂圈見得人多，有時聽啲娛記嘅老死講，見到啲奀星扮大牌，真係好鬼谷氣，好似啲記者前世欠咗佢幾百萬咁，吓吓都黑晒口面。好似賣歌藝嘅側田就成日畀記者話佢出碟嗰陣就好合作，做親訪問都有問必答，但宣傳期一過就即刻玩變臉，問親乜都藐嘴藐舌，又曾經暗示怕咗班記者想做番幕後，唔知呢啲叫唔叫做「冇事鍾無艷，有事夏迎春」呢？
最弊呢種「美德」仲好似「豬流感」，竟然會人傳人，傳染埋佢身邊嘅人，簡直係物以類聚！之前小小So去咗個Party，見到側田個緋聞女友奀模曾雪華（Eugene），唔知係咪以為榮升「田嫂」就學人囂張，態度寸到爆！記者問佢有關側田嘅嘢，就淨係識得硬繃繃答「唔知、唔講，唔清楚！」記者問佢攞電話仲反問點解：「我唔需要做訪問。」不過，佢見到個幾英俊嘅男攝記就態度三百六十度轉變，嗲聲嗲氣話：「
，你偷影人嘅！」小小So路過都聽到打冷震，唔知側田聽到係咪都會即刻冧晒呢？