蔡卓妍（阿Sa）與樂基兒（Gaile）無懼「空降鏹水彈」危機於鬧市出席活動，阿Sa更乘坐開篷巴士由中環到銅鑼灣，果然「膽生毛」！而Gaile則提議出街要做足安全措施。
阿Sa昨日為宣傳由她配音的音樂劇，由中環乘坐開篷巴士到銅鑼灣，更在「冇瓦遮頭」的行人路派海報及紙扇，場面墟冚。對於旺角前日有狂徒掟「鏹水彈」，傷及約三十名途人，阿Sa直斥狂徒所為：「咁做梗係唔啱！記得第一次掟鏹水彈，我有個朋友就畀啲鏹水濺中，啲衫褲都辣到穿咗窿！（減少出席鬧市活動？）活動嘅嘢真係好難避喎！」
怒斥狂徒行為過分
首次為音樂劇配音的阿Sa坦言相當興奮，更表示想每年都作新嘗試：「我好鍾意小丸子，上年試過舞台劇，都想試多次，做做啲有關跳舞嘅角色！（想唔想同鍾欣桐一齊做？）好呀！下次一齊！」至於有報道指謝霆鋒自組「謝家班」，阿Sa坦言未有聽聞，問她會否支持霆鋒？她說：「係先算！最近拍廣告有見過霆鋒，不過我唔鍾意過問人哋嘅嘢！」
行街切記有瓦遮頭
至於Gaile昨日到高危的旺角出席Neutrogena代言人活動，她坦言會盡量小心，因為她不時都會帶外國朋友到旺角逛街。問到男友黎明可擔心她到旺角？Gaile笑說：「大家都有睇新聞，同事同公司都知道邊啲地方安全先會接工作！」她又轟狂徒行為過分：「唔知點解個人會咁做！但咁做真係好過分！惟有出街要小心啲，去有瓦遮頭嘅地方，戴埋Cap帽同埋行街唔好淨係望地下！」
而詹瑞文昨日則到「鏹水彈」黑點（旺角行人專用區）舉行活動，順道「體察民情」，詹Sir說：「香港人唔驚得咁多！危險嘢交畀警方處理，大膽而開心嘅嘢就我哋做！」問到可有想過取消活動？他說：「唔會！風雨不改，除非一陣飛好多樽落嚟！」他更大呼：「打倒亂揼嘢！」