金牌大風近日因人事調動而謠言滿天飛，昨日新任香港區行政總裁陳輝虹接受本報獨家專訪時，大方回應種種傳聞。對於有傳古巨基因黃栢高（Paco）被「燉冬菇」而不續約，他直言公司未能滿足基仔的條件：「喺依家嘅大氣候下，似乎做唔到佢要求。佢要求過Paco開戲畀佢，鄭生（鄭東漢）亦同意咗，佢嘅要求合理，只係公司覺得吃力，如果其他公司有咁嘅金額，祝佢喺不同環境下再創新成績。」言談間暗示與基仔的6年合作即將結束。輝虹表示續約不單是錢銀的考慮，又暗寸基仔說：「如果Paco『被燉』佢就走，佢咁飲水思源，應該擸衫袖幫手，點解搞咁多新聞？」
|
|
讚Paco多年成績驕人
輝虹強調Paco擢升為香港區主席是正面的事，他說：「我係代表鄭東漢先生回應公司嘅立場同角度，今次嘅人事調動有積極意義，唔係外界所指嘅『燉冬菇』，呢個係最緊要嘅一點！」他表示金牌大風從02年開始以音樂為中心，是時候向電影方面探索，並大讚Paco多年來的成績有目共睹：「內地市場太大，要時間，而Paco亦有興趣喺有限嘅資源下突破；我就會做多少少音樂部分，分開發展係無可避免。」
否認鄭中基做CEO
問到鄭中基是否被爸爸鄭東漢安排接任金牌大風CEO，輝虹表示對方冇興趣亦冇時間：「佢錄緊國語碟，11月喺台北、台中同台南都有演唱會，手頭仲有兩部電影，以佢嘅時間表，冇可能做到CEO！（為佢鋪路？）相信佢有興趣做幕前多啲。」輝虹坦言市場正在萎縮，但金牌大風在中港台亦有健全架構，旗下的藝人如張惠妹、棒棒堂、方力申、側田及鄧麗欣等亦有連串工作。至於金牌大風前晚舉行的飯局，輝虹表示希望藝人藉此了解公司的改動，並澄清Paco並非臨時拉伕，亦沒有不快。
至於基仔昨晚出席《TVB512再展關懷》時，直認合約問題已有定案，對於被指因Paco調職而狠撇金牌，他說：「我冇了解新聞，唔方便講咁多，同Paco有一定感情，大家心知。（講到好似離開咁？）遲啲話你知。（Paco請你拍戲？）如果佢叫到，我會，遲啲搵個適合時間、地點公布。（唔捨得？）我冇答你任何嘢。」