陳沛嘉份人一向好積極，成日話做人一定要對社會有貢獻，估唔到佢對自己要求高之餘，對寵物一樣有要求。兩隻愛犬喺佢安排之下，一齊做咗狗醫生，一於做隻有貢獻嘅「好狗」，嗰日陳沛嘉打畀小小So，把聲開心到好似執到金！
陳沛嘉 ：真係好開心呀！繼Smiley之後，我屋企另外一隻狗仔Sweetie都成功考到狗醫生喇！
小小So ：佢哋以後咪可以一齊去探訪囉？
陳沛嘉 ：係呀！佢哋好快就會去老人院，氹嗰度啲公公婆婆開心！
小小So ：嘩！咁你咪好忙？
陳沛嘉 ：每個月去一、兩次，唔係好多啫！同埋老公得閒都會陪我湊佢哋去。
小小So ：你兩隻狗仔點解咁叻，全部考到做狗醫生？
陳沛嘉 ：佢哋細細個開始受訓，容易同人相處，唔亂發脾氣，所以好易通過！我真係好開心，佢哋以後可以做一隻對社會有貢獻嘅狗仔，唔係淨係陪我玩。