溝仔走佬
船主最怕自己隻船太得閒，日日坐喺屋企冇嘢做，分分鐘悶起上嚟出去溝仔，咁就大鑊，因此好多船主都會叫隻船報讀興趣班，學乜都好，總之要搵啲世藝做下，每日都過得好充實，等佢冇時間搞三搞四。不過好似老友阿聰咁，就真係自己攞嚟搞，事關佢叫隻船去學品酒，須知道品酒課程學費唔平，仲要唔少有米又得閒嘅男士去上堂，結果阿聰畀咗幾皮嘢幫隻船交學費，點知條女讀咗唔夠三個星期，就搭上咗另一個船主走佬。阿聰得知後梗係傷心啦，冇咗條女，仲使咗幾皮嘢，家陣隻船去如黃鶴，睇怕呢期我都係唔好搵佢，費事佢呻窮起嚟唔知幫唔幫手好。