吹水自由行

收到多位「毒」者提及；平日幻想同囡囡有吹唔盡嘅話題，但一見到女就「毒」癮發作，唔知點先可以同對方展開話題？同想問有乜方法可以增加多啲溝通嘅實戰經驗喎！

我深切了解毒男嘅痛苦，皆因回想我啱啱出嚟鎅女時，九成失敗居多，但我可以話你知，平常生活中每一個位都可以練習同異性嘅溝通技巧。例如你去麥記買個8蚊包，去茶檔食蛋撻，只要Serve你嗰件係女，即使係「阿姐」一名，閣下都可以發揮你幽默嘅小宇宙，冧到對方滿心歡喜！若然對方肯笑一笑，你已算成功，相反佢無視你，唔係佢人格有問題，反而你應該檢討問題所在，下次試吓用其他方法。

以上嘅實戰撩女吹水只係初階，要成為達人級，又想免費喪吹，細佬提議你要多啲同保險、基金經紀出嚟傾偈，無論係你朋友、或電話Cold Call，總之對方把聲係女就即刻應約，由於佢哋有目的兼受過專業訓練，見客九成時間都係有佢講冇你講，但咁正好係你「呃水吹」嘅最好機會。

按我經驗，呢啲所謂專業人士，講車講錶講買餸佢哋都吹得幾嘴，真係唔怕冇水吹。假如你連呢啲一心Sell客嘅經紀都吹到佢冇晒計、笑晒口咁散場的話，以後落夜場吹水仲使乜驚呀！強積金半自由行已經開始，你準備好喪吹無極限未呀？