世界波：春夢啟示 解讀話咁易

近年小弟發少咗白日夢，可能因為人生閱歷多咗，知道好多夢想都難以實現，例如以前會想買間擁有前後花園嘅洋房住，家陣有間公屋住吓已經滿足。雖然白日夢少咗，但春夢就完全冇少過，當中有啲仲為我哋帶來啟示添！

記得小弟由發育時期開始，便經常發春夢，夢見自己畀一大群囡囡圍住嚟錫，又或者同性感又好波嘅動漫人物纏綿。一覺醒來之後，大腦轉個不停，除咗因為要搞清楚夢境同現實之外，仲要諗吓於春夢過後，如何善後遺「漬」。當中有啲春夢叫人回味，亦令我開始研究如何解讀春夢。

反映現實

對於夢境分析，坊間有好多相關書籍，不過對於解讀春夢嘅有關資料就少之又少。最近，美國就有網站發表咗一則有關春夢解讀，以及夢境如何反映現實嘅文章，大家不妨睇睇自己有冇發過以下春夢，而個夢又有咩意思啦！

與前度交歡

如果夢見自己同前度女友或男友交歡，千祈唔好以為自己想同對方和好如初，夢醒之後急急拎起電話打畀對方喎。其實發呢種夢，可能係因為自己對前度仲有感覺，如果你已另結新歡的話，就可能係你對呢段新戀情仲未產生足夠安全感，所以至會發呢種夢，你最應該做嘅，係同新歡加強關係。

激戰大明星

相信好多朋友都同我一樣，不時夢見自己同女明星上床，好似日本AV女優櫻心美、Julia等等都曾經喺夢中同我有一手，諗起都甚覺滋味。至於女士們亦可能夢見過自己同畢彼特、羅拔柏迪臣有染。至於夢見自己同明星上床，原因可能係因為覺得自己嘅社會地位、名譽、運氣、公眾認知度或者係抱負唔夠高，想滿足吓虛榮心。

陌生人纏綿

發夢可以天馬行空，有時甚至可以夢到自己完全唔認識嘅事物，所以我哋有機會夢見自己同唔認識嘅陌生人上床。已故心理學家Carl Jung有個理論就話，男人體內有一種屬於女性嘅能量，而女人亦有屬於男性嘅能量，若夢見自己同陌生人做愛，可能係身體屬於異性嘅能量同原本性別嘅能量失衡所致，所以男人發此春夢，應該多啲欣賞有關男人浪漫嘅小說同電影。

偷食朋友妻

好多人總覺得外國嘅月光特別圓，朋友嘅女友或男友總係特別好，所以唔難解釋點解有咁多賤人鍾意搶人女友或男友。不過，若然夢見自己同老友嘅伴侶發生關係，唔好以為自己鍾意咗佢，好多時只不過係同伴侶關係唔好，又或者仲係單身，所以至喺夢中一圓擁有理想伴侶嘅希望而已。

赫見奇怪人

如果你夢見自己同一個擁有四個胸，或者長有尾巴或牛角嘅女人上床，唔代表你睇得科幻電影太多，原因可能係你嘅創意靈感多到湧出嚟，轉行寫作或做廣告創作可能有運行。又可能你正處於長大蛻變中，不過放心，我哋唔係寵物小精靈，唔會突然進化嘅！