世界波：享受性愛 慳錢Keep Fit一劑過

啲女人成日都話我哋男人滿腦子色情思想，朝思暮想都係為咗同佢哋上床。所謂食色性也，食飯同上床都係本能，根本就唔可以怪我哋，而且，做愛其實有好多好處，除咗可以促進彼此情感交流外，仲可以養生，最喜出望外係可以慳到錢添！

小弟早前約咗個女仔去睇戲食飯，埋單使咗我五舊水，好彩個女仔有35D上圍先令我有多少安慰。佢好客氣咁話，下次去街佢找數。我就話：「為免大家破費，不如下次我哋留喺屋企度過溫馨一晚仲好啦！」佢聽完後流露出一個鄙視眼神，咁係因為佢唔明白上床對人有幾重要。根據瑞典一個情趣玩具品牌最近發表嘅報告指出，上床原來有4大好處o架！

賺得更加多

據統計，美國有5成打工仔覺得自己人工偏低，而有一個研究發現，一個星期上床一次嘅人，比起一個月上床一次嘅人搵多5萬美元一年！研究話健康性生活可以增加31%生產力、37%銷售成功率以及3倍創意，即係做愛可令勞動階層、銷售人員以及開發人員增加工作效率，見到員工表現咁好，老細自然樂意加人工。

減低購物欲

要改善財政狀況，除咗開源，仲要識得節流。對女性而言，要節流最佳嘅方法就係減少Shopping次數。有研究指出，唔少女人因為工作表現不受重視或被指指點點，因而自尊心低落，希望藉購物以彌補心靈創傷，皆因購物可令大腦產生多巴胺呢種令人開心嘅腦內分泌物；但做愛其實更有效增加多巴胺分泌，做得愛多，唔使「濕平」都一樣開心。

護膚品慳番

為咗令自己容光煥發，明艷照人，絕大部分女性都願意花錢買護膚品同幫襯美容院。據統計，美國嘅女性平均每人每月會花75美元幫襯美容院，買護膚及美容產品就要花去超過100美元。其實健康性愛可以促進肌膚氧氣循環達4倍，令肌膚變得更具光澤及彈性，咁咪唔使花咁多錢美容囉！

超輕鬆瘦身

大部分女士們都好緊張自己嘅身材，有統計指出9成美國女性覺得自己體形過胖，與其要身水身汗做運動瘦身，不如每星期做愛3次，一年埋單計數就可以幫助女士消耗4萬卡路里，有得爽又可以減肥，簡直一舉兩得。