謝絕男色

我望住牛頭角里安納度充滿慾火嘅眼神，再望望自己手上包中藥，開始明白點解自己百病纏身，相信係時候要節制一下，於是我狠狠打發佢走，仲叫佢以後唔好再跟蹤我，亦都唔好再出現喺我屋企附近，否則我會報警求助。佢見我咁認真又咁勞氣，成身慾火都畀我打散咗，於是乖乖咁離開，我睇住佢背影遠去，先至敢返屋企。

可能有姊妹會覺得我好殘忍，事關依家呢個世代癡情男已經愈來愈少，甚至係稀有動物，如果有機會遇上，真係要好好珍惜。無錯，對於市面上一般剩女嚟講，佢可能係筍盤，但對於我Barbara姐嚟講，佢只不過係我其中一個床伴，仲要係一晚嗰隻，更何況我近期房事過密，男人對我嚟講，更加係毒物，一定要敬而遠之，先至可以搞番好個身體。

結果我休戰咗3個月，呢3個月我好似變咗另一個人，平時一見到靚仔就打雀咁眼嘅我，竟然失去咗獵食嘅興趣，每日準時返工放工，有時仲會買餸返屋企煮飯仔，真係連我自己都好意外，更何況我啲好友。好似有晚火星人打嚟撩我出去應戰，平時我一定飛奔出去，嗰日竟然有神無氣，好平淡咁話要上床瞓覺，嚇到火星人死咁滯，以為我有末期絕症先至變成咁。我冇好認真咁解釋，由得佢點諗都好，總之我呢期要齋戒沐浴，結果我有絕症嘅傳聞就係咁樣以訛傳訛傳開咗，仲愈傳愈似層層添……（待續）

Lady Barbara

某大公司高級行政秘書，年齡係秘密，蒲齡更加無謂講，向以獵男為己任，志願係嫁個有錢人，日日行街Shopping、High Tea做Facial，早日脫離打工行列。