世界波：揀啱性地淑女變淫娃

今日係情人節，咁浪漫，梗係要諗定同情人去邊度「開戰」啦！而美國有成人網站早前就向4,000名女網民進行調查，叫佢哋選出心目中最理想嘅「性戰」場地，結果發現，無論外表幾端莊嘅淑女，內心都會渴望有一刻放縱，所以男人真係要留意以下重點，作為今晚嘅參考數據，令雙方都可以過一個充實而浪漫嘅情人節。

口不對心係女人嘅專利，男人無論有幾神通廣大，好多時都畀佢哋點到陀陀擰，如果你自問都係摸不透女人心嘅人，就一定要睇睇以下3處女人最愛嘅「性地」，以後開戰就識做啦！

第一位：陌生地刺激

對於正經女人而言，係絕對唔會隨便跟陌生人去陌生地方，但如果對方係自己信賴嘅人，或者係相戀多年嘅伴侶，又唔同講法。喺調查中，有4成女人都想伴侶突然帶佢去一個陌生地方，展開一場激烈又刺激嘅性愛。雖然佢哋把口永遠唔會講出嚟，但心裏面呢份渴望，卻係千真萬確。

注意事項：男人進行呢項計劃前，一定要確定雙方都有充裕時間，免得玩到興起，完事後又要急急腳離場，咁就會影響咗性愛嘅質量。

第二位：泳池好浪漫

泳池最大嘅作用係用嚟游水，但唔知點解，竟然有3成女人心入面都好想去泳池開戰，儘管當有男人向佢哋提議時，佢哋唔會即時答應，但心入面其實已經欲拒還迎。據一啲被訪者解釋，佢哋覺得泳池嘅感覺好浪漫，尤其是入夜後，燈光打喺水影中，泛起點點粼光，令氣氛變得浪漫起嚟，女人自然更加冧！

注意事項：如果男人真係有機會帶伴侶去泳池做愛，不妨多利用水嘅浮力，嘗試多啲新體位，令性愛變得更有趣味。

第三位：衣帽間放蕩

女人日常流連在衣帽間的時間，一定比男人多，而且某程度上，衣帽間就係佢哋嘅王國，試問有邊個女人唔想擁有一個又大又寬敞嘅衣帽間？所以女人喺如此熟悉嘅環境下做愛，一定可以更放蕩，再加上衣帽間嘅鏡面，反映出兩人激情嘅裸體，令性愛增添唔少刺激元素，難怪係2成女人嘅心水性地。

注意事項：男人不妨趁女人「埋鏡併併」之際，作出突擊行動，令佢哋乍驚乍喜，當然事後要預留時間畀女人再次裝身，如果趕時間就咪制喇！