上海 少女夜門診

上海係一個繁華熱鬧嘅地方，夜生活更係多姿多采，但原來近年上海嘅夜生活，多咗一樣好特別嘅「夜診」服務。你會話「夜診」服務喺香港都好普遍啫！但打正旗號為少女病人而設嘅就真係上海先有。

需求量大

相信大家都會好奇怪，妙齡少女點解大白天唔去醫院睇病，咁古怪要夜晚至嚟幫襯呢？原來呢啲門診係專為一啲有難言之隱嘅囡囡而設，而主要治療對象就係意外懷孕嘅少女們。

有網友就話，要醫院專開一個時段嚟招呼佢哋，一定有好大嘅需求，如果唔係醫院都懶得咁做，唔通少女意外懷孕嘅情況，已經到咗非常普遍嘅地步？據網上資料顯示，目前上海大約有8至10間醫院設有「少女夜診」服務，而服務嘅時間，則由下午5點開始，直至晚上9點至10點左右，開放時間大約係4至5個小時。

嚟睇病嘅少女，每個都要輪候一段時間，可想而知，門診裏面長時間都有人嚟幫襯。當醫生1個小時睇10個病人，4至5個小時就睇咗4、50人，如果其他醫院嘅情況都一樣，即係話一個上海，每晚都有4、500個少女需要幫助，數目可以話係十分驚人。當然，佢哋未必全部都係意外懷孕，但當中求診嘅少女中，絕大部分都係涉及兩性關係而出現問題，情況真係不容忽視。