中佬冇性福

好多議員都支持中產階層，指政府制訂政策往往搵中產開刀。老實講，中產交稅多但福利少，真係好陰功！而夾喺中產階層嘅中年男士就更辛苦，第一，十幾年前買樓結婚，家陣層樓仲未供完；第二，仔女又未出身，就算已出身，依家又普遍人工低，啲仔女話唔定仲要阿爸資助，所以做人老竇嘅中年男士惟有死捱爛捱！但係人到中年精力減弱，真係想捱都未必頂得順。返工面對工作壓力，收工返到屋企仲要對往黃面婆，好彩老婆性趣低落，未必要老公「交功課」，否則進一步削弱精力！然而，正因為老婆冇性趣，所以好多中年男人都覺得冇性福喇！

難獲滿足

根據網站Associated Press and LifeGoesStrong.com，訪問咗1,500位年齡介乎45至65歲嘅已婚中年男女，當中有24%嘅男受訪者表示性生活唔滿足，反而65歲以上嘅長男，覺得性生活唔滿足嘅比率只係17%。另外，有61%中年男士認為性生活係夫妻溝通嘅重要一環，但亦有53%中年女士則表示性生活完全唔重要。既然女人唔將性生活當係一回事，認為可有可無，咁樣男士又點會享受到滿足嘅閨房之樂，得到性福吖！當然，如果女人覺得性生活重要，因而晚晚需索，唔知啲中年男士又頂唔頂得順囉！