暈倒姐制服惹的禍

今屆廣州亞運終於順利落幕，眾多運動員嘅出色表現固然係焦點，但估唔到網民對一眾禮儀小姐，更係時刻關注。好似開幕當日，嘉賓致詞期間一直企喺後面笑容滿面嘅「微笑姐」；仲有捧獎牌捧到手軟，因為得獎選手替佢抹汗而感動到喊嘅「流淚姐」咁。兩位禮儀小姐都得到網友極高評價，而臨近賽事結束，更出現一名「暈倒姐」，引起網民注意。

為保隊形 死頂上陣

話說龍舟賽頒獎現場，有一位身穿「行雲流水服」嘅義工，竟然因為天氣太熱嘅關係，喺頒獎台前暈倒地上，即時嚇得一眾運動員同頒獎嘉賓不知所措。義工隊馬上出動，將暈倒義工搬去陰涼嘅地方，該名義工稍事休息後，已無大礙。

由於事出突然，而且喺鏡頭前暈倒，於是引起廣大網友嘅興趣。經網友喺網上人肉搜尋，發現原來呢個義工名叫何俊葳，出生於1990年，名副其實嘅90後囡囡，於是有口痕網友就話，當今國民體質咁差，就算攞多多金牌，都難掩國民體質欠佳嘅事實。

網民之後又發現，小何原來係南方醫科大學二年級嘅學生，於是有網民揶揄佢能醫不自醫，要佢好好檢討。小何休息咗一日之後，就接受媒體訪問，佢話由於當日天氣太熱，義工們又心急，於是一早就出場地準備，最大意係忘記龍舟隊隊員比一般運動項目多，所以頒獎時間亦特別長。其實小何訓練時已經知道，為免影響隊形，就算覺得唔舒服都要死忍，唔可以中途離開，於是就發生咗呢次暈倒事件，佢自己都表示，喺遞上獎牌時暈倒，覺得好遺憾。網民聽到後都讚小何夠專業，雖「暈」猶榮，於是將矛頭指向好睇唔通風嘅「行雲流水服」上。

其實小記覺得，唔舒服就要出聲，我諗當局寧願隊形唔靚，都唔希望有人因為死頂而影響身體健康，下次再有同類情況，希望大家識執生啦！