女藝人丈夫突然出家的新聞都令人幾愕然，唔知佢丈夫條頸長唔長呢？原來面相學中，條頸生得長而有肉、不露筋骨嘅人，品格比較高尚，有遠大嘅理想，藝術方面嘅天分亦好高，古時一啲得道高僧或者道士，條頸都生得比較長。
身體方面，呢類人會十分健康，一生少有病痛，而且人緣極好，有好多人都喜歡聽佢講嘢，係個唔錯嘅領袖，可惜金錢運麻麻，經常都係財來財散，唔可以積存久享，但由於樂天知命，所以對錢財視作過眼雲煙，唔會放喺心上。
感情運方面，因為深得異性歡迎，做佢哋嘅另一半，初時都會十分擔心，但佢哋心裏有更高嘅情操，所以唔會做對唔住伴侶嘅事，以前就會擔心出家做和尚，但近年唔係咁興，所以唔使咁驚，就算萬一真係要出家，都會安排好一切先至皈依。